Недвижнините и понатаму се најпопуларна форма на инвестиција во Македонија, но и во поголемиот дел од Европа. И покрај високите цени, интересот за купување станови не стивнува – напротив, пазарот бележи рекорден раст.

Според најновите податоци на Народната банка, во третиот квартал од 2025 година цените на становите пораснале за 25,1 процент, што е највисок раст досега.
Во претходните квартали растот изнесувал 19,9 проценти (втор квартал) и 19,5 проценти (прв квартал).

Овие бројки покажуваат дека по умерениот раст во текот на 2024 година, пазарот на недвижнини годинава повторно „експлодира“. Во 2024 година кварталниот раст се движеше меѓу 4,6% и 11,4%, но 2025 година носи двојно побрзо поскапување.

Трендот на раст не е ограничен само на Македонија. Според Евростат, цените на станбените недвижности во Европската Унија во вториот квартал од 2025 година се зголемиле за 5,4% во однос на истиот период лани, а кириите за 3,2%.

Од 2010 година до денес, цените на куќите во ЕУ пораснале за 60,5%, а кириите за 28,8%. Највисок раст е забележан во Унгарија (277%) и Естонија (250%), додека во Италија цените дури паднале за 1%. Кај кириите, најголем раст бележат Естонија (218%), Литванија (192%), Унгарија (125%) и Ирска (117%), додека Грција е единствена членка на ЕУ каде што кириите се намалени – за 9% од 2010 година наваму.

И покрај растот, недвижнините остануваат најсигурното вложување за македонските граѓани – сектор што, барем засега, не покажува знаци на ладење.