Министерот за внатрешни работи на Србија, Ивица Дачиќ, изјави дека полицијата спречила голема трагедија при вооружениот напад и пожарот во шаторската населба пред Народното собрание, позната како „Ќациленд“.

Според него, осомничениот Владан Анѓелковиќ пристигнал на местото со намера да изврши насилство врз луѓе кои „размислуваат поинаку“, носејќи пиштол и бензин.

„Анѓелковиќ влегол во шаторот, го запалил, пукал во луѓето и го ранил Милан Богдановиќ. Полицијата реагираше навреме и спречи поголема трагедија,“ изјави Дачиќ за РТС.

Министерот нагласи дека напаѓачот не бил психички болен и дека мотивот бил политички судир. „Ова лице дошло со намера да изврши насилство. Испукал неколку куршуми, го фрлил пиштолот во шаторот, а потоа предизвикал и пожар,“ додаде Дачиќ, објаснувајќи дека се спроведува детално вештачење на оружјето и местото на настанот.

Според него, нападот е квалификуван како обид за убиство и предизвикување општа опасност, а осомничениот се наоѓа во притвор.

Министерот предупреди дека поттикнувањето насилство врз политички неистомисленици е „опасен тренд“ и апелираше на разум, мир и стабилност.

„Ова е човек кој дошол подготвен – донел бензин, пукал на случаен начин и запалил шатор. Ваквото насилство не смее да се релативизира,“ порача Дачиќ.

Претседателот Александар Вучиќ го оцени инцидентот како терористички чин, додека јавноста бара одговорност за безбедносните пропусти и радикалната реторика што ја подгрева тензијата во Белград.