Мајката на загинатиот Стефан Хрка, Дијана Хрка, која штрајкува со глад веќе шести ден, утрово го повика претседателот на Србија, Александар Вучиќ, лично да дојде и „пред сите да разговара со неа“.

Хрка изјави дека не верува дека Вучиќ ќе се појави, бидејќи, како што рече, „тој нема храброст“.

„Сега му се обраќам директно на Вучиќ. Ова што се случува е на лична основа. Само нека дојде да ми каже на која лична основа, па јас ќе му кажам некои работи“, рече таа, додавајќи дека се чувствува добро и покрај деновите без храна.

Хрка својот штрајк со глад го започна на 2 ноември, по комеморативниот собир во Нови Сад по повод едногодишнината од трагедијата на железничката станица, кога при паѓањето на настрешницата загинаа 16 лица, меѓу кои и нејзиниот син.

Пред Собранието на Србија, каде што таа го постави својот шатор, владее мирна атмосфера, но присутна е полиција со опрема за растерување демонстрации.

Граѓаните секојдневно и приоѓаат на мајката на Стефан за да ја прашаат за нејзиното здравје и да и понудат помош – некои и нудат храна, други вода, а трети дури и свој стан во близина на Собранието за одмор и туширање.

Хрка бара процесирање на сите одговорни лица за трагедијата, како и ослободување на приведените студенти и распишување на вонредни парламентарни избори.