Цената на евро-дизелот од денеска порасна за 3,5 денари по литар и достигна 95,5 денари, и покрај владината мерка за намалување на ДДВ од 18% на 10%. Цената на бензинот остана непроменета на 86,5 денари за литар.

СДСМ реагираше дека мерката на премиерот Мицкоски нема ефект. „Само еден ден по прес-конференцијата, дизелот поскапе за 3,5 денари”, изјавија од опозицијата, предупредувајќи дека ова е третото поскапување во три недели, со кумулативен раст од 24,5 денари по литар. Партијата укажува на каскадни поскапувања на основните производи – маслото за готвење надмина 100 денари, а јајцата 300 денари.

Премиерот Христо Мицкоски ја одбрани политиката, тврдејќи дека владата одржува стабилни резерви, а намалувањето на ДДВ заштедува над 200.000 евра дневно. Тој забележа и зголемена потрошувачка од соседните земји, што создава притисок на граничните региони.

ВМРО-ДПМНЕ, пак, тврди дека Македонија има убедливо најниски цени на горивата во регионот и дека „со навремена и прецизна интервенција се прекина трендот на раст на цените”.