Аеродромот во Минхен синоќа привремено беше затворен откако биле забележани дронови во и околу аеродромскиот простор. Германската полиција соопшти дека неколку лица пријавиле дрон во близина на пистите, а подоцна биле забележани и над самата аеродромска зона. Засега не е јасно дали станува збор за еден или повеќе дронови.

Од безбедносни причини, сите писти беа затворени до доцна вечерта. Според аеродромските власти, безбедноста на патниците е највисок приоритет во вакви случаи.

Поради прекинот, беа откажани 17 полетувања, што погоди речиси 3.000 патници. Патниците веднаш беа згрижени во терминалите – поставени беа војнички кревети и обезбедени ќебиња, пијалаци и закуски. Дополнително, 15 слетувања беа пренасочени кон Штутгарт, Нирнберг, Виена и Франкфурт.

Државни и федерални службеници, заедно со полициски хеликоптер, ја пребарале областа, но не пронашле ниту дронови ниту сомнителни лица.

Инцидентот се случува во период кога во Минхен се одржува светски познатиот Октоберфест, а Европа е во состојба на зголемена готовност поради слични случаи на дронови забележани над критична инфраструктура и аеродроми во Германија, Данска и Норвешка.