Двете големи американски компании „Аптив“ и „Дура“, кои работат во технолошко-индустриските развојни зони во Скопје и се дел од автомобилската индустрија, до крајот на следната година ќе го напуштат македонскиот пазар. Компаниите заедно вработуваат околу 1.000 лица.

Информацијата е потврдена од претседателот на Советот на странски инвеститори при Стопанската комора, Виктор Мизо, кој не откри детали за причините, наведувајќи дека станува збор за интерни корпоративни одлуки.

Според Мизо, најавите за заминување се дел од поширока консолидација на производните капацитети на глобално ниво.

– „Европската индустрија е во стагнација. Некои компании ќе се адаптираат, други потешко. Но тоа не значи дека Македонија ќе престане да привлекува инвестиции. Ние продолжуваме да вложуваме и да се развиваме“, изјави Мизо, кој е и генерален директор на „Костал Македонија“.

Мицкоски: „Не е крај на светот – едни заминуваат, други доаѓаат“

Премиерот Христијан Мицкоски смирува дека заминувањето на „Аптив“ и „Дура“ не треба да се сфати драматично. Тој најави дека до крајот на годината Владата ќе потпише договори со најмалку четири нови компании кои би отвориле околу 1.000 нови работни места.

– „Компании ќе се отвораат и ќе се затвораат, и домашни и странски. Тоа е дел од економскиот циклус. Ние сме фокусирани на привлекување нови играчи и верувам дека сме меѓу најконкурентните во Европа“, рече премиерот.

Изјавата премиерот ја даде при посетата на фабриката „Костал“, каде менаџментот објави продолжување на инвестицискиот циклус.

Каи Кникман, извршниот директор на „Костал Аутомотив“, најави дека компанијата во 2026 година ќе вложи дополнителни 30 милиони евра.

– „Новите инвестиции ќе донесат нови производи, зголемување на производството за 20% и отворање на 200 нови работни места“, изјави Кникман.

Податоците на Народната банка покажуваат значителен пад на странските директни инвестиции во првата половина од годинава.
Во 2024 година, заклучно со јуни, инвестициите достигнале околу 600 милиони евра. Во истиот период оваа година изнесуваат нешто над 200 милиони евра.

Странски директни инвестиции – 2024 vs 2025 (во милиони евра)

• Јануари: 82,92 → 29,43

• Февруари: 86,46 → 40,82

• Март: 143,04 → 75,13

• Април: 120,07 → 35,96

• Мај: 86,68 → 35,36