Државниот завод за ревизија (ДЗР) ги објави ревизиските извештаи за Министерството за односи меѓу заедниците за 2024 година. Наодите покажуваат сериозни неправилности во управувањето, финансиите и јавните набавки, а ревизорите издадоа неповолно мислење за реалноста на финансиските извештаи на институцијата.

Меѓу најзагрижувачките наоди е исчезнувањето на имот — 30 преносни компјутери не биле пронајдени при годишниот попис, а основни средства во вредност од 25.360 евра (1,56 милиони денари) целосно недостасуваат. Покрај тоа, за 7 моторни возила нема воспоставена никаква сметководствена евиденција.

Особено загрижувачки е начинот на исплата на платите: за 150 вработени — или 61 проценти од плаќаните по Потпрограма К5 — платите биле исплаќани без доказ за присуство на работа и без потврда за полно работно ангажирање, иако постои електронски систем за евиденција.

Во делот на јавните набавки, Министерството потрошило 516.000 денари на гориво за возила кои не му припаѓаат. Понуди со сомнителни цени — вклучувајќи понуда за сервис по 0,01 денар за работен час — не биле ниту анализирани ниту контролирани.

На 33 граѓански здруженија и фондации биле распределени 320.900 евра, но 17 организации или 51 проценти мораат да ги вратат средствата поради недостаток на докази дека парите биле потрошени наменски. Дел од документите биле доставени само на албански јазик без задолжителен превод на македонски.

ДЗР укажа и на административни пропусти: зградата нема осигурување од пожар и кражба, не е воспоставена функција за внатрешна ревизија, а надлежностите не се јасно разграничени меѓу вработените.