Хаос на свадбени веселби во Далмација – во два одделни инциденти што се случија во ист ден, една жена го загуби животот, а друга се здоби со сериозни повреди откако беа погодени од сигнални ракети.

Трагичниот случај се случи во Шибеник, каде што ракета испукана за време на свадба ја погоди жена во главата. И покрај итната медицинска интервенција, таа почина во Општата болница во Шибеник, објави „Слободна Далмација“.

Неколку часа претходно, околу 18 часот во Макарска, гостинка на свадба пред катедралата на плоштадот Качиќ исто така беше погодена од пиротехничко средство, најверојатно ракета. Таа паднала, се здобила со фрактура на карлицата и веднаш била хоспитализирана. За случајот е известено и државното обвинителство.

Несреќата во Макарска е поврзана со свадбата на младоженец од Задар, а според неофицијални информации, свадбената група по инцидентот се упатила кон Чапљина, додека повредената побарала помош во Здравствениот дом во Макарска.

Сплитско-далмациската полиција го потврди инцидентот и соопшти дека е спроведена истрага на лице место, а кривичната постапка е во тек.