Државната компанија Електрани на Северна Македонија (ЕСМ) донесе одлука да исклучи три економски оператори од идните постапки за јавни набавки, поради, како што е наведено, „значителни недостатоци во исполнување на клучни обврски“, што довело до еднострано раскинување на претходни договори. Одлуките се објавени во „Службен весник на Република Северна Македонија“ бр. 167 од 14 август 2025 година.

Кои компании се исклучени?

Од понатамошно учество во јавните набавки на ЕСМ се исклучени следните фирми:

• ДОН ХОЛДИНГ ДООЕЛ увоз-извоз Скопје
  Согласно Одлука на Управниот одбор на АД ЕСМ бр. 02-7732/31/02 од 03.12.2024 година.

• Ел-Те Инженеринг ДОО Скопје
  Согласно Одлука бр. 02-70/43/1 од 09.01.2025 година.

• Марковски Компани Борче ДООЕЛ увоз-извоз Битола
  Согласно Одлука бр. 02-8346/41/12 од 26.12.2024 година.

Во документот е наведено дека сите три компании имале сериозни пропусти при исполнување на претходно склучени договори, поради што ЕСМ еднострано ги раскиналa обврските.

Со оваа мерка, компаниите ќе бидат оневозможени да учествуваат во идните јавни набавки на ЕСМ во определен рок, согласно Законот за јавни набавки и внатрешните прописи на претпријатието. Мерката се смета за една од најстрогите во системот на јавни набавки и се применува кога државата утврдува сериозни неправилности.

Особено внимание привлекува исклучувањето на „Марковски Компани“, чиј сопственик Борче Марковски веќе е под истрага. Компанијата и нејзиниот сопственик се осомничени за злоупотреби поврзани со јавни набавки во ЕСМ, а Марковски во моментов се наоѓа во притвор.

Истражните органи водат постапка по сомнеж дека фирмата злоупотребувала буџетски средства и манипулирала со тендерски процедури.