Додека Европската унија забрзано дигитализира, Македонија значително заостанува. Според најновите податоци на Евростат, 71,9 отсто од граѓаните на ЕУ користат е-услуги на јавните институции, додека во Македонија тој процент изнесува само 32,32 отсто.

Македонските граѓани сè повеќе ги користат услугите на е-влада, но сè уште се далеку под европскиот просек. Најчесто се бараат информации за бенефиции, закони и работно време на институциите.

Разликата од речиси 40 процентни поени покажува дека земјата има долг пат пред себе за да го достигне европското ниво на дигитализација на јавните услуги.

Експертите укажуваат дека причините за заостанувањето се повеќеслојни – од недоволна дигитална инфраструктура и ниска дигитална писменост, до недостиг на целосно функционални електронски услуги кои би им ги олесниле контактите на граѓаните со институциите.