Граѓаните кои скенираат фискални сметки преку апликацијата „МојДДВ“ и очекуваат поврат за третото тримесечје сè уште не ги добиле средствата, иако вообичаено исплатите пристигнуваа меѓу 10 и 15 во месецот. Доцнењето предизвикува загриженост кај корисниците, со оглед дека законскиот рок истекува на 30 ноември.

Од Владата велат дека ќе направат проверка за да се утврди што го забавило процесот.
„Информациите се дека повратот се одвива регуларно, но ќе побарам проверки во Министерството за финансии и УЈП“, изјави владиното портпаролка Марија Митова.

Од Управата за јавни приходи појаснуваат дека нивната улога е да ги извршат пресметките, додека исплатата е обврска на Министерството за финансии. Оттаму уверуваат дека нема да има пробивање на рокот и дека исплатите ќе бидат завршени навремено.

Според последните податоци на УЈП, околу 503.000 граѓани активно скенираат фискални сметки, а за второто тримесечје биле исплатени 14,3 милиони евра.

Мерката „МојДДВ“, воведена во 2019 година, продолжува да функционира и покрај критиките што во минатото ѝ беа упатени од актуелната власт. Министерството за финансии најави надградби на системот, но не и целосно укинување.

Најчестите причини за доцнење кај поединечни корисници, велат од Министерството, се погрешно внесени или неажурирани трансакциски сметки во системот на УЈП.