Европа се соочува со сериозна закана – некои од најпознатите и најубави плажи на континентот би можеле да исчезнат во следните сто години, предупредува Европската агенција за животна средина (EEA). Според податоците, нивото на морето расте со забрзано темпо, по 3,7 милиметри годишно меѓу 2006 и 2018 година – повеќе од двојно од просекот во 20 век, пренесува „Јуроњуз“.

Доколку емисиите на штетни гасови не се намалат, нивото на морето до 2100 година би можело да порасне меѓу 63 сантиметри и еден метар, а во најлошото сценарио, со забрзано топење на поларните ледени капи, до 2150 година може да достигне и пет метри.

Најзагрозен дел од европското крајбрежје е островот Свети Стефан во Црна Гора, каде научниците предвидуваат повлекување на брегот за повеќе од 200 метри до крајот на векот. По него следуваат Порто Џунко на Сардинија (107 метри) и Бенагил во Португалија (70 метри). На листата се и плажите на норвешкиот остров Верој (58 м), Ким Беј во Ирска (40 м), Рејнисфјара во Исланд (35 м), Мариније во Франција (35 м), како и Пасјача во Хрватска, која би можела целосно да исчезне до 2100 година.

Последните две загрозени зони се бреговите на Корнвол во Англија и делот меѓу Ница и Кан во Франција, со предвидена ерозија од 30 до 28 метри.

Професорот Џорџо Будијон од Универзитетот во Неапол нагласува дека дел од овој процес е неповратен, бидејќи климатскиот систем има „инерција“ што го продолжува топењето на мразот и термичкото ширење на океаните.

„Предупредувањата за исчезнување на плажите не шират паника, туку реална слика за иднината без решителна акција,“ вели Будијон. „Решението лежи во обновување на мочуриштата, заштита на подводната вегетација и контролирано полнење на плажите.“