На тековната Конференција на ОН во Њујорк, повеќе држави планираат официјално да ја признаат палестинската држава, јавува ДПА. Настанот се одвива во пресрет на годишното собирање на светските лидери на Генералното собрание на ОН.

Францускиот претседател Емануел Макрон, заедно со Саудиска Арабија, е домаќин на конференцијата, која започнува денеска во 15 часот по локално време (19 часот по Гринич), со цел да се поттикне решението за две држави.

Освен Франција, и Белгија и Нов Зеланд најавија планови за признавање на Палестина, и покрај жестокото противење од Израел. Вчера тоа веќе го направија Велика Британија, Канада и Австралија, станувајќи првите големи западни економии што ја признаа палестинската државност.

На конференцијата ќе се обратат и британскиот премиер Кир Стармер и канадскиот премиер Марк Карни, а Германија ќе биде претставена преку својот министер за надворешни работи Јохан Вадефул, кој ја поддржува визијата за две држави, иако Берлин сè уште се противи на формално признавање.

Израел и неговиот главен сојузник, САД, ја бојкотираат конференцијата. Палестинскиот претседател Махмуд Абас ќе се приклучи преку видео врска.

Годишната Генерална дебата на ОН започнува утре, со очекувано присуство на околу 150 шефови на држави и влади.