Во текот на судскиот процес за пожарот во „Пулс” во Кочани, управата на кумановскиот затвор поднесе одговор на поплаките на обвинетиот Дејан Јованов, познат и под надимок „Газда Деко”. Управата потврди дека обвинетиот немал поплаки на постапувањето на вработените.

Единствената жалба се однесувала на квалитетот на душекот и честите претреси на ќелијата. Управата нагласи дека претресите се стандардна постапка за сите притворени лица и служат за превенција на внесување на забрането – пред сè мобилни телефони.

Адвокатот на одбраната Ивана Коцевска го информирала судот дека е добиена усна согласност за премин на нејзиниот клиент во затворот Идризово, но оваа постапка сè уште не е финализирана.

Дејан Јованов е еден од 35 обвинети поединци и три правни субјекти во врска со пожарот во кочанската дискотека во март 2025 година, во кој загинаа 63 лица, а над 200 беа повредени. Судењето се одвива во кривичниот суд во Идризово.