ВМРО-ДПМНЕ најави сеопфатен реизбор на раководствата во сите 76 општински комитети на партијата, како и нови избори за претседателите на Унијата на ветерани, Унијата на жени и Унијата на млади сили.

Одлуката беше донесена на првата седница на Извршниот комитет, а за неа информираше генералниот секретар Драган Ковачки, кој повика на „свежа крв” и нова енергија во партиските структури.

„Ова е шанса за секој член кој сака активно да се вклучи во креирањето и носењето на одлуки. Отворени сме за секој што сака да биде дел од тимот што победува”, изјави Ковачки.

Тој нагласи дека партијата функционира како динамична организација која постојано се надградува и отвора простор за свежи идеи. Реизборот, според него, претставува можност за илјадници членови и активисти кои имаат визија, знаење и мотивација да придонесат во развојот на организацијата.

Ковачки ги повика да се пријават луѓе со личен и професионален интегритет, кои ќе придонесат за поголемо единство и ќе работат одговорно и посветено.

Јавниот повик е отворен до 19 февруари и е објавен на официјалната интернет-страница на ВМРО-ДПМНЕ.