Вчера околу 17:25 часот избувна голем пожар во објекти кои се користат како магацини на ЈПКД „Комуналец“ во Струмица. На местото на настанот интервенираа четири противпожарни возила и 15 пожарникари од ТППЕ Струмица.

Пожарот беше во разгорена фаза и многу тешко за гаснење. Заради големата опасност по животите на пожарникарите, беше побарано исклучување на електричната енергија од ЕВН. Еден од тимовите, и покрај силниот дожд, изврши отворање на лимениот покрив за да се овозможи испуштање на чадот од магацинските простории.

Пожарот е локализиран и целосно ликвидиран, но предизвика значителна материјална штета. ТППЕ Струмица продолжи со дежурство на местото на настанот за да се обезбеди дополнителна безбедност.