Една од најголемите рафинерии за нафта на „Лукоил“ во Волгоград, Русија, е привремено затворена откако беше погодена од украински беспилотни летала, јавува Ројтерс, повикувајќи се на три извори запознаени со инцидентот.

Во нападот се оштетени клучни производствени единици, вклучувајќи ја и главната преработувачка единица CDU-5, со капацитет од 9.100 тони дневно (66.700 барели) — што претставува една петтина од вкупниот капацитет на рафинеријата. Оштетена е и единица за хидрокрекинг со капацитет од 11.000 тони дневно.

„Рафинеријата е затворена. ЦДУ-5 гореше, а хидрокрекерот беше делумно оштетен,“ изјавил еден од изворите за Ројтерс, кој побарал да остане анонимен.

Компанијата „Лукоил“ досега не одговорила на барањата за коментар.
Рафинеријата во Волгоград минатата година преработила 13,7 милиони тони нафта, што претставува 5,1% од вкупниот руски капацитет.

Во последните месеци, Украина често напаѓа руски рафинерии, складишта и нафтоводи, додека Русија продолжува со удари врз украинската енергетска инфраструктура, во војна која влегува во четвртата година.

Покрај рафинеријата, во четвртокот Украина нападна Русија со најмалку 75 беспилотни летала, при што загина едно лице, а беа откажани десетици летови низ земјата.

Гувернерот на Волгоградската област, Андреј Бочаров, изјави дека 48-годишен маж бил убиен од шрапнел при нападот, а пожарот избувнал во индустриска зона во Красноармејскиот дел на градот, некогаш познат како Сталинград.