На окупираниот Крим и во Севастопол околу 50% од бензинските пумпи престанаа да продаваат бензин, а многу од нив се целосно затворени, објави „Комерсант“. На пумпите кои сè уште работат има само дизел и природен гас. Локалните власти воведоа рационализација, дозволувајќи снабдување само за службени возила. Според локални активисти, ситуацијата е критична и може да ја загрози есенската сеидба.

Проблемите не се ограничени само на Крим. Мониторинг на 17.000 пумпи во Русија покажува дека недостиг има и во други региони, но најтешко е погоден Јужниот федерален округ, каде повеќе од 220 пумпи ја прекинале продажбата на гориво.

Податоците покажуваат дека меѓу 28 јули и 22 септември бројот на пумпи што продаваат гориво во Русија опаднал за 2,6%, а во некои региони – Ростовска област, Република Мари Ел и Еврејска автономна област – падот достигнал и до 14%.

Кризата се влоши по бранна украински напади со дронови врз руските рафинерии во август. Според „Фајненшел тајмс“, нападнати биле најмалку 16 од 38 рафинерии, со што извозот на дизел паднал на најниско ниво од 2020 година.

Рускиот вицепремиер Александар Новак најави дека владата ја продолжува забраната за извоз на бензин до крајот на годината, освен за испораки според меѓудржавни договори. Дополнително, ќе биде воведена и забрана за извоз на дизел гориво за компании кои не се производители.