Нафтена индустрија на Србија (НИС) денеска ги информираше потрошувачите дека од утре повеќе нема да бидат снабдувани со гориво, бидејќи резервите се сериозно намалени. Во наредните денови компанијата ќе обезбедува гориво исклучиво за таканаречени приоритетни потрошувачи, објавуваат српските медиуми.

Информацијата ја соопшти претседателот на Партија за слобода и правда, Драган Ѓилас, кој остро ја критикуваше власта за, како што вели, неспособноста да ја заштити енергетската стабилност на државата.

„Александар Вучиќ ја проверува е-поштата на секои десет минути, очекувајќи информации од Унгарците и Русите дали е постигнат договор, додека од Абу Даби ни се порачува дека Србија ништо не бара. Тоа не е точно – член 8.2 од договорот за продажба на НИС на Газпром Нефт предвидува право на првенствено купување на рускиот удел. Србија мора да се праша кога е во прашање сопствената енергетска безбедност“, изјави Ѓилас.

Тој предупреди дека српската економија влегува во сериозен проблем, кој ќе трае сè додека не пристигнат нови количини нафта и повторно не започне со работа рафинеријата, најдоцна до 23 јануари.

Ѓилас додаде дека одбивањето да се донесе закон со кој државата би го презела управувањето со НИС ја чини Србија сè повеќе секој ден.

„Седницата на Собранието е закажана за утре. Доколку имавме Влада што ги штити националните интереси, законот со кој ја земаме судбината во свои раце ќе беше на дневен ред. За жал, ниту Ана Брнабиќ ниту Вучиќ немаат храброст за тоа. Цената на нивниот кукавичлук ќе ја платат сите граѓани на Република Србија“, порача Ѓилас.