Од следната недела започнува реконструкцијата на железничката пруга на првата траса од проектот „Градски воз“, со која ќе се создаде нова брза, економична и еколошка транспортна опција за скопјани.

Јавното претпријатие „Македонски железници – Инфраструктура“ го потпиша договорот со изведувачот „Битем“ ДООЕЛ – Скопје, вреден околу 5,8 милиони евра без ДДВ. Според договорот, работите ќе траат шест месеци, а веќе следното лето градскиот воз ќе сообраќа на првата линија.

Проектот опфаќа ремонт на 25 километри пруга, на делницата од Зелениково – Јане Сандански – Драчево – Лисиче – Централна железничка станица Скопје. Целта е брзината на возовите да се зголеми од сегашните 20 на над 60 километри на час, што ќе овозможи побрз и поефикасен превоз за жителите од југоисточните делови на градот.

„Со овој ремонт, граѓаните од Драчево, Зелениково, Јане Сандански и Лисиче ќе можат да стигнуваат до центарот на Скопје побрзо, поевтино и со помало загадување“, соопштија од Македонски железници – Инфраструктура.

Директорот Синиша Ивановски изјави дека „Градскиот воз“ ќе биде алтернатива на автомобилите и автобусите, а со тоа ќе се намали и загадувањето во главниот град. Тој најави дека за станиците кои се оддалечени од населените места, како онаа во Драчево, ќе се воведе минибус-превоз во синхронизација со возниот ред.

Според Ивановски, напролет ќе започне редовен сообраќај на првата линија, а до крајот на 2027 година треба да бидат завршени три траси од проектот:

• Прва траса: Зелениково – Драчево – Лисиче – Центар (25 км)

• Втора траса: Илинден – Миладиновци – Маџари – Центар (25 км)

• Трета траса: Централна станица – Скопје Север – Ѓорче Петров – Волково (18 км)

Во буџетот за 2026 година е предвидено проектирање на втората траса, а во 2027 започнува и третата. Ќе се реновираат и 11 железнички станици, а две до три нови се планира да се изградат според физибилити-студијата на Градежниот факултет.

Вицепремиерот и министер за транспорт Александар Николоски истакна дека „Градскиот воз“ претставува нов концепт на урбан сообраќај, кој ќе ја искористи постојната железничка инфраструктура и ќе ја претвори во модерен градски транспортен систем.

„Веќе започнавме со работите на првата делница. Следната година ќе ги подготвиме и другите две линии, со цел да создадеме редовен, брз и достапен железнички сообраќај за сите скопјани“, рече Николоски.

Тој додаде дека Владата е во преговори со Европската банка за обнова и развој (ЕБОР) за набавка на нови локомотиви и вагони, со што ќе се модернизира целиот систем на Македонски железници.