Иранската Револуционерна гарда (ИРГЦ) соопшти дека при вчерашниот напад на нејзините поморски сили врз локација во Обединетите Арапски Емирати – каде наводно се одржувал таен состанок на американски офицери – загинале 37 лица, а бројни други се повредени.

Според ИРГЦ, нападот бил спроведен врз основа на разузнавачки информации, а цел биле американски воени лица.

„Според доверливи разузнавачки извештаи, вчерашниот напад на поморските сили на Гардата врз тајно собиралиште на американски офицери во ОАЕ резултираше со 37 загинати и повредување на бројни лица кои беа транспортирани во градските болници”, се наведува во соопштението.

Без потврда од САД и ОАЕ

Засега не постои независна верификација на овие тврдења, ниту властите во ОАЕ или Соединетите Држави официјално реагираа на наводите.

Доколку тврдењата се покажат точни, би се работело за удар врз исклучително вредна цел, со потенцијални директни оперативни последици. Истовремено, инцидентот на територија на ОАЕ дополнително ја комплицира безбедносната слика во регионот и отвора прашања за проширување на конфликтот надвор од конвенционалните борбени зони.