Израелската војска реагираше на иранските обвинувања за оштетување на Пастеровиот институт во Техеран по воздушен удар. Според иранското министерство за здравство, лаборатории, истражувачки оддели и административни згради на оваа историска установа претрпеле штета.

Портпарол на израелската војска изјави за Скај Њуз дека целта била командниот центар на иранскиот режим, намерно изграден во близина на институтот. „Израелската војска го погоди командниот центар на терористичкиот режим во Техеран, кој режимот намерно го изгради во близина на Пастеровиот институт”, стои во изјавата.

Војската нагласи дека ги почитува нормите на меѓународното право и негираше намерно гаѓање на цивилна инфраструктура. „Ние не гаѓаме цивилни институции, вклучувајќи истражувачки и медицински објекти со посебна заштита, туку само воени цели”, објасни портпаролот.

Реакцијата доаѓа среде засилен меѓународен мониторинг на израелските операции, особено во однос на ударите врз медицински објекти.