Израелскиот министер за надворешни работи Гидеон Саар го обвини хрватскиот претседател Зоран Милановиќ за антисемитизам поради неговите изјави за Израел и блискоисточниот конфликт.

На социјалната мрежа X, Саар напишал: “Навредливата реторика на хрватскиот претседател е неприфатлива. Неговиот јазик полн со омраза кон Израел и ционизмот одразува антисемитски пристап.” Тој додал дека Хрватска, како членка на Меѓународниот сојуз за сеќавање на Холокаустот, се обврзала да се бори против антисемитизмот и дека претседателот “ги издал овие обврски”.

Спорот произлегол од изјавите на Милановиќ по средбата со израелскиот амбасадор Гери Корен, кој бил повикан во претседателски кабинет. Милановиќ изјавил дека и Иран и Израел применуваат терористички методи на Блискиот исток. При опишувањето на загриженоста на амбасадорот за иранската амбасада во Загреб, Милановиќ одговорил: “Некој официјален претставник од Тел Авив посочи дека во центарот на градот има терористичко гнездо. Ова е Загреб, не Тел Авив.”