ТЕЛ АВИВ – Израелските одбранбени сили (ИДФ) денес потврдија дека извршиле напад со беспилотни летала на југот на Либан во кој е убиен командантот на елитните сили Радван на движењето Хезболах, според израелските медиуми.

Убиениот оперативец Заин ал-Абидин Хусеин Фатуни бил командант на противтенковската ракетна единица на силите Радван и бил вклучен во обновата на инфраструктурата на Хезболах во јужен Либан, според ИДФ, како што објави „Тајмс оф Израел“. Како што се додава во соопштението, Фатуни бил застрелан додека возел автомобил во градот Џибчит, во близина на градот Харуф, во јужниот регион Набатија, пренесува Танјуг.

Израелската војска, исто така, соопшти дека тој неодамна учествувал во напорите за повторно воспоставување на терористичката инфраструктура на Хезболах во јужен Либан.

Како што објави ИДФ, неговите активности претставуваат прекршување на договорот меѓу Израел и Либан, објави „Тајмс оф Израел“.