На 5 октомври, Светскиот ден на учителите, повторно се отвори прашањето – дали општеството доволно ги вреднува оние што го градат неговиот темел?

Иако нивната улога е незаменлива, просветните работници и понатаму се соочуваат со ниски плати, несигурни договори и политички влијанија, предупредуваат од Независниот синдикат за образование и наука.

„Колективните договори не се почитуваат, што резултира со плати пониски од државниот просек. Имаме и сериозен проблем со партизацијата – со промена на локалната власт се менуваат и просветни работници, што создава нестабилност во системот“, изјави Томислав Гиевски од синдикатот.

Од Министерството за образование, пак, најавуваат мерки за подобрување на состојбите и подигање на угледот на професијата.

„Владата презема бројни активности – покачување на платите, обезбедување учебници и подобрување на инфраструктурата во училиштата. Учителите не треба да се грижат за својата плата во следните четири години“, изјави министерката Весна Јаневска.

Во рамки на одбележувањето на Светскиот ден на учителите, беа доделени и признанијата „Просветен работник на годината“, како симболична благодарност за нивната посветеност.

Овој ден, прогласен од УНЕСКО во 1994 година, потсетува дека без мотивирани и поддржани наставници, нема ниту квалитетно образование. Или, како што рече пензионираната професорка од Куманово, Елизабета Секирарска:

„Учителите се тивките херои што ја градат иднината.“