Министерката за образование и наука Весна Јаневска најави радикални промени во високото образование, вклучувајќи целосна забрана на вонредно студирање на наставничките факултети, додека Медицинскиот факултет и понатаму ќе остане затворен за вонредни студии.

„Дали би сакале да ве лекува доктор кој вонредно студирал медицина?” — со ова реторичко прашање Јаневска го образложи својот став во гостувањето на ТВ Сител. Таа нагласи дека промените се во јавен интерес на државата и се насочени кон подигање на квалитетот на образованието.

Според новиот Закон за високо образование, вонредното студирање повеќе нема да биде дозволено на регулираните професии — медицина и наставнички студии. Оние што веќе започнале вонредно на наставничките факултети ќе можат да ги завршат своите студии, но за идните генерации оваа можност ќе биде затворена.

Јаневска истакна дека оваа мерка има за цел да ги модернизира и зајакне студиските програми, за да може во иднина да се добие „подобар производ — не последен на ПИСА, туку ученици кои ќе се придвижат нагоре на скалилата на рангирање на знаењето”.

Јавната дебата за предложениот закон предизвика остри реакции во академската заедница и меѓу политичарите. Додека еден дел од стручната јавност ги поддржува реформите како неопходен чекор кон европски стандарди, други предупредуваат дека мерките би можеле да ги ограничат можностите за вработени кои сакаат да се стекнат со дополнително образование.

Министерката потврди дека законот нема да биде повлечен и дека јавната дебата ќе продолжи, со цел универзитетите да отворат студиски програми според потребите на пазарот на труд и да се зголеми квалитетот на наставата и научната продукција.