Во серија шокантни снимки до кои дојде „Инфомакс“, а потврдени и од очевидци на терен, кандидатот за градоначалник на Општина Пробиштип, Тони Тоневски, и заменик-министерот за социјална политика, демографија и млади, Ѓоко Велковски, се вмешани во скандал со злоупотреба на лични податоци и незаконска политичка агитација.

Според извори, Тоневски организирал средба со пензионери како дел од својата предизборна кампања, но наместо тоа да го направи транспарентно, ангажирал четири лица — меѓу кои и негова братучетка — кои користеле лични податоци на пензионерите за телефонски да ги повикуваат на состанокот. Таквиот потег претставува директно кршење на Законот за заштита на лични податоци и може да повлече сериозни кривични последици.

На самата средба присуствувал и министерот Велковски, кој, наместо да се дистанцира, агитирал за кандидатот Тоневски, што, според Кривичниот законик, претставува злоупотреба на службена функција и политичка активност во службено време — дело за кое е предвидена казна затвор до три години.

Новинарски екипи кои се обиделе да добијат изјава од Тоневски и Велковски биле вербално нападнати и избркани, а на местото на настанот се појавило и трето лице кое се претставило како обезбедување, иако немало овластување за тоа.

Без да одговорат на новинарските прашања и јавниот интерес, двајцата ја напуштиле локацијата со државно возило, оставајќи зад себе низа прашања околу можната злоупотреба на институциите во политички цели.

Граѓаните бараат реакција од надлежните органи и истрага за целиот случај, кој го отвора прашањето:
До каде оди злоупотребата на државните ресурси во предизборни цели?