Казахстан воведе целосна забрана за увоз на руско жито и сточна храна, одлука која претставува сериозен удар за Москва и нејзините извозни амбиции. Комитетот за ветеринарен надзор при казахстанското Министерство за земјоделство ја одобри мерката, наведувајќи влошена епизоотиолошка состојба.

Ембаргото опфаќа пченица, ‘рж, јачмен, овес, пченка и соја, како и преработени производи и готови мешавини за исхрана на добиток. Руските извозници веќе соопштуваат дека возовите со жито се запираат и враќаат од граничните премини.

Забраната ги погодува и директната трговија и транзитните операции. Казахстан е клучен коридор за дистрибуција на руско жито кон други земји, што оваа одлука ја прави потенцијално значајна за глобалните синџири на снабдување.

Руските извозни количини на жито веќе бележат пад од околу 16 отсто од почетокот на сезоната. Властите ги означија мерките како привремени, но не дадоа рок на траење, што создава дополнителна неизвесност на пазарите.

Аналитичарите оценуваат дека потегот на Астана може да има далекусежни последици за руската економија, особено во период кога Москва е под западни санкции и се потпира на азиските партнери за одржување на трговските текови.