Кина ја засили својата присутност околу спорните острови Сенкаку (Дјаоју), испраќајќи крајбрежна стража и воени беспилотни летала во близина на јапонската територија, во момент когато дипломатските тензии меѓу Пекинг и Токио остро се зголемуваат по коментарите на јапонскиот премиер за можен воен одговор во случај на напад врз Тајван, пренесува „Гардијан“.

Кинеската крајбрежна стража соопшти дека нејзините бродови извршиле „правно оправдана патрола“ во водите околу островите што Кина ги смета за свои. Во соопштението беше наведено дека операцијата имала цел „заштита на националните права и интереси“.

Овој потег доаѓа само неколку дена по изјавата на премиерот Санае Такаичи, која во парламентот рече дека напад на Кина врз Тајван би можел да ја активира јапонската самоодбрана. Пекинг реагираше жестоко, барајќи повлекување на изјавата.

Кина го смета Тајван за дел од својата територија и не ја исклучува употребата на сила за „повторно обединување“. Тајван категорично го одбива тоа и најавува отпор. Инвазија би можела да предизвика голем регионален конфликт, со можност да ги вклучи САД и нивните сојузници, вклучувајќи ја и Јапонија, која има територија на само 110 километри од Тајван.

Во меѓувреме, Тајванското Министерство за одбрана регистрирало 30 кинески воени авиони, седум воени бродови и еден брод на крајбрежна стража околу островот во последните 24 часа. Мапите покажале и три кинески беспилотни летала како летаат помеѓу Тајван и јапонските острови, опасно приближувајќи се до Јонагуни – најблискиот јапонски остров до Тајван.

Иако кинеските патроли во овој простор не се без преседан, толку концентрирана активност во краток период влијае врз стабилноста во регионот во момент кога односите меѓу Јапонија и Кина се на најниско ниво во последните години.