Кинеските државни нафтени компании, меѓу кои Петро-Чајна, Синопек, СНООК и Женхуа Оил, привремено го стопираа купувањето на руска нафта што се испорачува по морски пат. Според извори блиски до индустријата, одлуката е донесена поради стравувања од вторични санкции што САД ги воведоа кон руските нафтени гиганти Роснефт и Лукоил.

Одлуката на Пекинг доаѓа во време кога и Индија, исто така еден од најголемите купувачи на руска сурова нафта, најави ограничување на увозот од Москва. Индијските компании, како Рилајанс Индистрис и неколку државни рафинерии, ги преиспитуваат договорите за да избегнат прекршување на американските мерки, а дел од нив веќе најавија делумен или целосен прекин на увозот на сурова нафта од Русија.

Рускиот претседател Владимир Путин изјави дека Русија „никогаш нема да подлегне на притисокот“ од Вашингтон, но призна дека новите санкции би можеле да предизвикаат економски тешкотии. Според него, мерките се дел од „непријателска медиумска и економска кампања“, но нема да ја променат надворешната политика на Москва.

Аналитичарите предупредуваат дека падот на побарувачката од Кина и Индија ќе ја зголеми финансиската тежина врз Русија, иако краткорочно влијанието врз глобалните цени на нафтата ќе биде умерено. Според прогнозите на банкарскиот гигант УБС, пазарот би можел да се соочи со краткотрајна нестабилност, но не и со долгорочен раст на цените, поради моменталниот вишок на понуда на глобално ниво. Суспензијата не се однесува на испораките преку цевководите, особено не на нафтоводот кој ги поврзува руските полиња во Сибир со Кина, каде што снабдувањето засега останува стабилно.