Кина ги обвини Соединетите Американски Држави за двојни стандарди и се закани со контрамерки, откако американскиот претседател Доналд Трамп најави нови 100% царини за увозот од земјата.

Портпаролот на кинеското Министерство за трговија порача дека „прибегнувањето кон закани за високи тарифи не е правилен начин за соработка со Кина“ и дека Пекинг не ја посакува трговската војна, но не се плаши да ја води.

„Ако САД продолжат со еднострани потези, Кина решително ќе преземе мерки за да ги заштити своите легитимни интереси“, истакна портпаролот, повикувајќи го Вашингтон „итно да го исправи својот погрешен пристап“.

Тој ги бранеше новите контроли на извозот на Кина како „легитимен потег“, обвинувајќи го Вашингтон за злоупотреба на концептот на национална безбедност и дискриминаторски мерки против кинеските компании. Според него, листата за контрола на извозот на САД опфаќа над 3.000 артикли, додека кинеската само околу 900.

Пекинг ја обвини администрацијата на Трамп дека ја ескалирала трговската тензија со нови рестриктивни мерки само 20 дена по последната рунда разговори во Мадрид, каде што бил постигнат делумен напредок.

Новите ограничувања за извоз на ретки земни метали од Кина, кои се клучни за индустријата и технологијата, дополнително ќе го зголемат притисокот врз глобалните синџири на снабдување.

Неколку часа по овие мерки, Кина објави дека ќе воведе такси за американските бродови што влегуваат во нејзините пристаништа – одмазда за новата американска пристанишна такса што стапи на сила истиот ден.

Министерството за трговија во Пекинг ги оцени потезите на Вашингтон како „сериозно нарушување на довербата и економската атмосфера меѓу двете земји“.

Во меѓувреме, трговските разговори меѓу двете страни стагнираат, иако Трамп и кинескиот претседател Си Џинпинг претходно се согласија да се сретнат на форумот АПЕК кон крајот на октомври во Јужна Кореја. По последните случувања, Трамп се закани дека може да ја откаже средбата.