Британската воена база RAF Акротири на Кипар беше погодена од ирански Шахед дрон, потврди британското Министерство за одбрана. Нападот предизвика минимална материјална штета и нема повредени, а британските сили веднаш активирале засилени одбранбени мерки – радарски системи, анти-дрон системи, борбени авиони F-35 и противвоздухопловна одбрана.

Кипарскиот претседател Никос Христодулидес нареди затворање на сите училишта ширум земјата и воведување евакуациски постапки каде е неопходно. „Се наоѓаме во регион со особена геополитичка нестабилност”, изјави Христодулидес, нагласувајќи дека безбедноста на граѓаните е „главниот приоритет на владата”.

Ударот врз Акротири дојде само неколку часа откако Британија им дала дозвола на Соединетите Американски Држави да ги користат британските воени бази на Кипар за операции против Иран. Британскиот премиер Кир Стармер претходно истакнал дека сè поголемото безодговорно однесување на Иран ги загрозило британските животи, поради што е донесена одлуката за одобрување пристап до базите.

Кипарскиот претседател нагласи дека неговата земја нема да учествува во никакви воени операции, продолжувајќи ја традиционалната хуманитарна улога на островот во регионот. „Сакаме да бидеме дел од решението, а не дел од проблемот”, потенцира Христодулидес.

Кипар, членка на ЕУ, е домаќин на напредна западна воена инфраструктура. Нападот ги актуелизираше прашањата за примената на членот 5 од Натовскиот пакт. Базата Акротири последен пат беше директна мета уште во средината на 1980-тите, кога либиски напаѓачи ги насочиле своите активности кон неа.