Претставници на американскиот Пентагон им соопштиле на членовите на Конгресот на затворен брифинг дека разузнавачките служби немале докази кои би укажувале дека Иран планирал да изврши претходен напад врз американски сили, иако воените операции на САД и Израел врз Иран веќе биле во тек.

Брифинзите се одржале откако американскиот претседател потврди дека САД започнале „масовни борбени операции” врз Иран, нагласувајќи дека нападите имаат за цел „заштита на американскиот народ” и елиминирање на заканите кои ги претставува иранскиот режим. На Truth Social беше соопштено и дека американските сили уништиле и потопиле девет ирански воени пловила, вклучувајќи и поголеми бродови.

Меѓутоа, демократите во Конгресот ја критикуваат администрацијата, велејќи дека овој конфликт е „избрана војна” и оспорувајќи ги наративите за самоодбрана. Истражувањето на Reuters/Ipsos покажало дека само 27 отсто од Американците ги одобруваат нападите, 43 отсто се противат, а 29 отсто се неодлучни.

Брифингот ги разниса главните тези со кои американската администрација ги оправдуваше воените активности, ставајќи дополнителен притисок врз Белата Куќа да ги објасни причините зад одлуката за интервенција. Посредникот Оман претходно бил проценил дека преговорите помеѓу САД и Иран имале изгледи за успех, но конфликтот им стави крај на дипломатските напори.

Ситуацијата во регионот останува крајно нестабилна. Ескалирањето на конфликтот на Блискиот Исток продолжува да предизвикува загриженост на меѓународно ниво, а кризата сè повеќе го тестира единството и доследноста на западните сојузници.