Поранешната шефица за надворешна политика на ЕУ наводно е вмешана во скандал околу наместен тендер за студентски дом во новоформираната академија во Бриж, која таа ја води.

Меѓу тројцата приведени во денешната рација во Белгија се Федерика Могерини, поранешна висока претставничка на ЕУ и тогашен ректор на Колеџот на Европа и Дипломатската академија на ЕУ, како и директорот на Генералниот директорат на Европската комисија за Блискиот Исток, Северна Африка и Персискиот Залив, Стефано Санино, поранешен генерален секретар на Европската служба за надворешни работи (EEAS) кога беше основан Колеџот.

Тие беа уапсени како дел од истрагата за наводна финансиска измама поврзана со финансирањето на Колеџот на Европа во Бриж.

Службеници на белгиската федерална полиција рано утрово ги претресоа просториите на Службата за надворешни работи на ЕУ (EEAS) во Брисел, Колеџот на Европа во Бриж и неколку приватни домови.

Претресот беше спроведен во врска со истрагата на Европското јавно обвинителство (EPPO) и Европската канцеларија за борба против измами (OLAF).

Според информациите на порталот „Еурактив“, истрагата се однесува на тендерот за купување зграда во Бриж која требало да служи како студентски дом за студентите на новоформираната Дипломатска академија на ЕУ во 2022 година.

Могерини, италијанска политичарка која беше на чело на ЕЕАС од 2014 до 2019 година, подоцна стана ректор на Колеџот на Европа, а потоа и директор на академијата по нејзиното основање.

Патем, Санино беше заменик-шеф на мисијата во италијанската амбасада во Белград од 1993 до 1995 година, а потоа и шеф на мисијата на ОБСЕ во Сојузна Република Југославија до 2002 година.

OLAF и EPPO истражуваат наводи дека Могерини имала внатрешни информации за тендерот за Академијата и добила грант од ЕЕАС во замена за наводно наместен тендер.

Вредноста на зградата на улицата Спаардстраат во Бриж се проценува на 3,2 милиони евра, велат извори на „Еурактив“. Во периодот што е предмет на истрага, на чело на ЕЕАС бил Жозеп Борел од Шпанија.

Колеџот на Европа е основан во 1949 година и работи како високообразовна школа за дипломати и бриселски службеници.