Основниот суд во Битола не го прифати предлогот на Обвинителството за определување мерка притвор за двајца од осумте осомничени во новата истрага поврзана со злоупотреби на јавни набавки во РЕК „Битола“. Наместо тоа, судот им одреди мерка куќен притвор. Станува збор за еден од раководителите на ПЕ Рудници и за Борче Марковски, сопственик на фирмата „Марковски компани“, која со години добивала тендери во комбинатот и како правен субјект е под истрага за злоупотреби.

Од Обвинителството реагираа дека не се согласуваат со ваквата одлука и најавија жалба. Според нив, постои ризик од бегство на осомничените, а еден од нив поседува значителен имот во странство.

Обвинителството денес отвори нова истрага против осум физички и едно правно лице за продолжени кривични дела поврзани со јавни набавки во РЕК „Битола“. Постојат докази за основано сомнение дека петмина од осомничените — поранешниот директор на комбинатот и четворица раководители и директори во ПЕ Рудници — во текот на 2023 година сториле продолжено кривично дело злоупотреба на службената положба и овластување.

Дополнително, тројца од раководителите и уште едно службено лице се осомничени и за продолжено кривично дело измама во службата. Според истрагата, правното лице и неговите претставници и покрај тоа што знаеле дека работите не се извршени, доставувале фактури со кои незаконито биле наплатени 106.200.000 денари, односно над 1,7 милиони евра со ДДВ.

Осомничените се товарaт за продолжено кривично дело злоупотреба на постапката за јавен повик и јавно-приватно партнерство. Обвинителството побара и дополнителни мерки на претпазливост за уште три лица, меѓу кои одземање на патни исправи и редовно јавување во судот.

Поранешниот директор на РЕК „Битола“ и едно службено лице веќе се наоѓаат во притвор или под претпазливи мерки во рамки на други постапки.