Координаторот на пратеничката група на СДСМ и пратеник Оливер Спасовски на денешната собраниска седница за пратенички прашања упати директно прашање до министерката за финансии Гордана Димитриеска-Кочоска во врска со високата цена на зелениот картон за автомобилите, кој е неопходен за патување надвор од државата.

Спасовски истакна дека ова прашање е од директен интерес за граѓаните и дека го има поставено и писмено уште на 12 февруари годинава, но до денес не добил одговор. Тој потсети дека сопствениците на моторни возила, согласно закон, се должни да имаат осигурување за заштита на трети лица и нивниот имот, како за внатрешен сообраќај, така и при патување во странство преку т.н. зелена карта.

Според него, зелената карта не е само меѓународен документ, туку претставува проширување на постојната осигурителна полиса со важност надвор од државата. Во Македонија, цената за патнички возила изнесува околу 5.500 денари за една година, што е значително повисоко од земјите во регионот.

„Во Србија, Босна и Херцеговина, Косово и Црна Гора, граѓаните плаќаат 5 или 10 евра за зелена карта, и тоа заедно со регистрацијата и внатрешното осигурување. Кај нас, граѓаните плаќаат многу повеќе“, нагласи Спасовски.

Тој посочи дека дел од земјите имаат билатерални договори што овозможуваат патување без зелен картон, додавајќи дека Македонија има таков договор со Словенија, каде што не е потребна зелена карта за влез со возило.

На крајот, Спасовски праша дали Владата и Министерството за финансии планираат промена на пристапот и намалување на цената на зелениот картон, со цел да им се олесни движењето на граѓаните надвор од државата и да се изедначи практиката со онаа во регионот.