Пензионираниот полковник на американската армија и поранешен советник на Пентагон, Даглас Макгрегор, изјави дека американската воена помош за Украина значително опаѓа, додека европските држави немаат ниту ресурси ниту поддршка од јавноста за да го продолжат војувањето уште долго.

Во интервју за Политика, тој нагласи дека војната на Косово 1999 година бил вовед во конфликтот во Украина, при што многу европски офицери приватно се спротивставувале на бомбардирањето на Србија. Според него, денеска „руското оружје превладува, а од воена гледна точка, положбата на Украина е безнадежна“.

Макгрегор додаде дека по средбата меѓу Доналд Трамп и Владимир Путин на Алјаска, веќе се наѕира крајот на конфликтот во источна Европа.

Тој истакна дека териториите Луганск, Доњецк, Запорожје и Херсон, иако делумно контролирани, веќе се вградени во рускиот устав и НАТО нема капацитет да ја промени таа реалност. Воедно, според него, НАТО „тивко се распаѓа“, а европските држави ќе мора самостојно да ја градат својата одбрана.

Говорејќи за Косово, Макгрегор оцени дека воздушната кампања на НАТО била и „непотребна и погрешна“, дел од стратегија за смена на режим, која подоцна се применувала и во Ирак, Либија, Сирија и Украина. Тој потсети дека многу европски генерали биле згрозени од бомбардирањето на Белград, особено на датумот што се совпаѓал со годишнината од германската инвазија во 1941 година.

„Вашингтон беше нетрпелив да ја употреби силата. Косово беше лабораторија за експериментирање со стратегијата на промена на режими“, рече Макгрегор.