Министерството за здравство утврди сериозни злоупотреби со кардиохируршки операции во јавни и приватни здравствени установи. Од анализираните 19 случаи, кај 10 е утврдено дека биле извршени непотребни операции или пациентите биле неоправдано упатени на хируршки зафати, соопшти министерот за здравство Азир Алиу.

„Од пристигнатите 25 случаи до Интерната комисија за кардиолошки и кардиохируршки интервенции, анализирани се 19, а кај половината од нив има наод за неправилности“, изјави Алиу на прес-конференција.

Шест од разгледаните предмети се проследени до Државниот санитарен и здравствен инспекторат (ДСЗИ), бидејќи не влегуваат во надлежност на комисијата.

Претседавачот на комисијата, д-р Жарко Христовски, објасни дека во првата фаза се анализирала единствено потребата од реваскуларизација кај пациенти со васкуларни заболувања.

„Одлуките ги носевме врз основа на достапната медицинска документација и пријавите што стигнаа од пациенти или здравствени установи до ФЗО и Министерството“, рече Христовски.

Министерството најави и ангажирање меѓународна стручна комисија, која заедно со домашните експерти ќе ги разгледа резултатите, ќе ги потврди сомнежите и ќе предложи мерки за подобрување на кардиоваскуларниот третман.

„Со интегрирање на јавниот и приватниот сектор и со размена на информации очекуваме да донесеме финални заклучоци и стратешки потези“, додаде Христовски.

Што е повод за контролите?

Проверки беа иницирани по изјавата на кардиологот Сашко Кедев, кој во гостување на Канал 77 тврдеше дека во приватни болници се изведуваат непотребни интервенции со цел профит.