Македонската дипломатија останува воздржана околу прашањето за признавање на Палестина, кое повторно стана тема на 80. Генерално собрание на Обединетите нации во Њујорк. Шефот на македонската дипломатија, Тимчо Муцунски, нагласува дека државата мора да биде внимателна и дисциплинирана во надворешната политика, а не импулсивна и емотивна.

„Во момент кога и самите земји членки на ЕУ немаат изградено консензус, не е време ние да истапуваме со каква било одлука во однос на Палестина,“ изјави Муцунски за ТВ Сител од Њујорк.

Тој потсети дека Македонија се консултира со САД како стратешки партнер, како и со партнерите во Европската унија. Според него, внимателното следење на состојбата е неопходно, особено имајќи ја предвид хуманитарната криза во Газа и нарушувањата на меѓународното хуманитарно право.

„Сите гледаме што се случува и тоа е несоодветно за 21 век. Но, тоа не значи дека треба импулсивно и емотивно да реагираме,“ додаде министерот.

Муцунски најави дека консултациите ќе продолжат, а конечна одлука околу признавањето на Палестина ќе се донесе кога ќе дојде соодветно време.

Во меѓувреме, неколку западни земји веќе објавија одлука за признавање на Палестина како држава. Германија засега не е меѓу нив, но притисокот врз германската влада расте. Досега речиси 150 од вкупно 193 земји членки на ОН ја имаат признаено Палестина, додека САД и Израел категорично го отфрлаат овој потег.