Министерството за внатрешни работи соопшти дека за едно деноноќие биле пријавени шест одделни случаи на семејно насилство во повеќе градови низ државата, при што биле приведени пет лица осомничени за различни облици на физичко и психичко насилство.

Во Гостивар, полицијата го приведе 27-годишниот Ј.З. по пријава дека им упатувал закани на членовите на семејството на сопругата преку социјалните мрежи. Во Крива Паланка имало два случаи: 18-годишник физички го нападнал татко си, а 49-годишен маж ги нападнал децата на сопругата. Во Битола, 33-годишен маж бил притворен поради физички напад врз 25-годишната сопруга во семејниот дом.

Во Прилеп, 45-годишна жена пријавила физички напад од страна на сопругот. Во Охрид, полицијата го притвори 44-годишниот О.Л. по пријава дека физички ги нападнал невенчаната партнерка и нивното малолетно дете.

МВР соопшти дека се преземаат мерки за целосно расчистување и документирање на сите случаи, по што против сторителите ќе бидат поднесени соодветни пријави.