Глобалните цени на нафтата достигнаа над 110 долари за барел, како последица од нападите врз енергетската инфраструктура на Блискиот Исток среде воениот конфликт меѓу САД и Израел од една страна, и Иран од друга.

Брент суровата нафта порасна на 110,90 долари за барел, додека американската сурова нафта достигна 99,78 долари, по извештаите за ирански напади врз енергетска инфраструктура во повеќе земји од Персискиот Залив.

Пожари беа пријавени во клучни енергетски постројки во Катар, а воздушни удари беа пресретнати во Саудиска Арабија. Нападите доаѓаат по предупредувањата на Иранската револуционерна гарда дека ќе возврати за атентатот врз претставникот на Советот за национална безбедност, Али Ларијани.

Американскиот претседател Трамп на социјалните мрежи тврдеше дека САД „не знаеле ништо” за израелскиот удар врз Јужен Парс, иако американски медиуми претходно известија дека претседателот го одобрил нападот.

Белата куќа привремено го суспендира Џонс актот, дозволувајќи на странски бродови да транспортираат стоки меѓу американските пристаништа во наредните 60 дена, во обид да ги ублажи последиците врз цените.