Една жена почина, а еден маж е сериозно повреден во напад од ајкула во близина на популарно место за сурфање на источниот брег на Австралија, соопштија властите.

Итни служби беа повикани на плажата Кроуди Беј во близина на Порт Маквари, околу 350 км северно од Сиднеј, во четврток наутро откако две лица беа каснати од ајкула, соопшти државната полиција на Нов Јужен Велс.

Жената, за која се верува дека имала околу 20 години и сè уште не е официјално идентификувана, починала на местото на настанот. Мажот, за кој се верува дека има и околу 20 години, бил префрлен со хеликоптер во болница во критична состојба.

Минувачите се обиделе да им помогнат на двојката пред да пристигнат службите за итни случаи, но жената не можела да се спаси. Плажата е затворена додека властите се обидуваат да утврдат за каков вид ајкула станува збор, соопштија властите.

Извршниот директор на „Сурф Лајф Савинг Нов Јужен Велс“, Стивен Пирс, изјави дека инцидентот се случил на „прилично оддалечена локација“.

„За жал, една млада жена беше убиена, додека еден маж беше однесен во болница. Овие инциденти се ужасни за сите, а за жал имавме неколку од нив оваа година“, изјави тој за 2GB.

Оваа година во Австралија имало пет смртни случаи од каснувања од ајкули. Во 2024 година имало 13 нефатални напади, во 2023 година имало четири смртни случаи, а во 2020 година имало седум фатални напади.

– Генерално, нападите од ајкули се зголемиле низ Австралија во последните две децении, изјави за „Гардијан Австралија“ професорот Чарли Хувенирс, директор на Конзорциумот за морски и крајбрежни истражувања на Универзитетот Флиндерс.