Околу 20 американски нуклеарни бомби се складирани во Германија — модернизирани, подготвени и дел од нуклеарниот чадор со кој САД ги штитат своите европски сојузници. Но, експертите предупредуваат: ова не е гаранција дека Вашингтон би одговорил со нуклеарен напад во случај на криза, особено во време на растечки сомнежи околу политичката волја на американската администрација.

Паралелно, се верува дека дел од американското нуклеарно оружје би можело да се премести во балтичките држави, Полска или Романија — чекор што би пратил силна порака до Москва. Сето ова се случува додека Бундесверот ја одбележува својата 70-годишнина во најнапната безбедносна атмосфера уште од нејзиното основање.

Информациите од САД и Европа укажуваат дека ова лето биле донесени дополнителни тактички нуклеарни системи во Европа, а истовремено Германија нарача авиони F-35 со способност да носат нуклеарно оружје. Американските нуклеарни бомби, во различни бројки, се веќе присутни во Белгија, Холандија, Италија, Турција и Велика Британија — проценката е околу 100 боеви глави, но точната бројка е тајна.

Руската закана – реална или психолошка игра?

Путин повеќепати прозборуваше за употреба на нуклеарно оружје од почетокот на инвазијата врз Украина, но експертите сметаат дека тоа е дел од стратегија на заплашување:
„Кој ќе пука прв, вториот ќе умре. Тоа никој не го сака“, вели германскиот аналитичар Карл-Хајнц Камп.

Русија има околу 5.500 нуклеарни боеви глави и интензивно ги модернизира — вклучувајќи ги новите хиперсонични ракети „Циркон“, дрон-ракета „Буревесник“ со нуклеарен погон и најновите подморници на нуклеарен погон со глобален дострел. Многу од овие системи се надвор од радарски домет, токму за сценарија на изненадна ескалација.

Дали нуклеарно оружје ќе се премести во Романија?

Полска јавно бара американско нуклеарно оружје на своја територија. Романија, пак, е повнимателна, но експерти предупредуваат дека токму Романија има најдобра инфраструктура за прием на вакви системи. Русија во своите анализи ја смета оваа опција како „најопасно сценарио“.

Франција исто така би можела да го прошири својот нуклеарен чадор кон Источна Европа, што би било најголемо поместување на европската нуклеарна доктрина по Студената војна.

Што би се случило во нуклеарен конфликт?

„Вашингтон пост“ објави драматична симулација:
– во првите секунди би испариле цели делови од градови,
– ударниот бран би рушел сè до километри далеку,
– над половина милион луѓе би загинале веднаш само во првиот удар врз Вашингтон,
– радиоактивните последици би направиле делови од Источниот брег непогодни за живеење,
– за три часа би имало преку 91 милион мртви и повредени во САД, Русија и НАТО.

Во сценариото, одговорот на САД би бил автоматско лансирање на 300 интерконтинентални балистички ракети, што би довело до целосна нуклеарна размена — со потенцијал да започне нуклеарна зима.

Зошто вакво сценарио најверојатно нема да се случи?

И покрај мрачните симулации, стручњаците веруваат дека токму свеста за последиците ја одржува рамнотежата.
Вашингтон и Москва добро знаат дека вистински нуклеарен конфликт би значел крај на современата цивилизација.