Во седиштето на НАТО во Брисел денеска се одржува вонреден состанок на Воениот комитет на Алијансата на ниво на амбасадори на земјите членки, поради нарушувањето на воздушниот простор на Пактот од страна на три руски борбени авиони МиГ-31К.

Инцидентот се случи во петокот, кога авионите без дозвола упаднаа во естонскиот воздушен простор и таму се задржаа речиси 12 минути, информира Министерството за одбрана на Естонија. НАТО веднаш реагираше и ги пресретна руските авиони.

Талин побара итен состанок согласно Член 4 од Договорот на НАТО, кој предвидува консултации меѓу членките секогаш кога е загрозен територијалниот интегритет или безбедноста на која било членка. Како дополнителна мерка, Естонија најави затворање на источната граница кон Русија.

„Ова е уште еден пример за неодговорно руско однесување и доказ за способноста на НАТО да реагира“, изјави портпаролката на Алијансата, Алисон Харт. Инцидентот го осуди и високата претставничка на ЕУ за надворешни работи и безбедност, Каја Калас, нарекувајќи го „исклучително опасна провокација“.

Москва, пак, тврди дека летот бил во согласност со меѓународните правила и дека не биле прекршени ничии граници.

Покрај тоа, Естонија побара итна расправа и во Советот за безбедност на ОН. Настанот следи откако претходно руски дронови го нарушија воздушниот простор на Полска и Романија – исто така членки на НАТО и ЕУ.

Како реакција на сè почестите руски прекршувања и нападите врз Украина, Европската комисија предложи нов, 19-ти пакет санкции насочен кон енергетскиот и банкарскиот сектор, трговијата со криптовалути и компании што го поддржуваат рускиот воено-индустриски комплекс.