Една недела по почетокот на воениот конфликт помеѓу Соединетите Американски Држави, Израел и Иран, американскиот претседател Доналд Трамп ја искристализираше политиката на Вашингтон: нема копнена инвазија, но целта е радикална промена на раководството во Техеран.

„Губење на времето”, рекол Трамп за можна копнена инвазија, истовремено најавувајќи „целосна смена на раководството” на Иран и американска вмешаност во изборот на следниот ирански лидер. Трамп изјавил дека Вашингтон веќе ги разгледува кандидатите за идно водство на Иран и дека тие „мора да преживеат” за да одиграат улога по конфликтот.

Трамп тврди дека Иран „изгубил сè” — тврдејќи дека 60 отсто од иранските ракети и 64 отсто од лансерите се уништени, а вкупно повеќе од 2.000 цели биле погодени, меѓу кои и десетици ирански воени пловила и носач на дронови. Американскиот министер за одбрана Пит Хегсет ги дефинираше американските цели: уништување на офанзивните ракети на Иран, производствените капацитети и воените пловила, со посебен акцент на спречување на нуклеарно вооружување.

Сепак, цената е висока. Шест американски војници го изгубиле животот при напад со дрон врз американска воена база во Кувајт, а вкупниот број на жртви во конфликтот надминал 1.000. Хормускиот теснец останува под притисок, а поморскиот сообраќај е речиси целосно запрен.

На прашање дали американските граѓани треба да се плашат од ирански напади на американска почва, Трамп одговорил: „Веројатно.” Реакциите не изостанаа — демократскиот сенатор Елизабет Ворен неговата изјава ја окарактеризира на платформата X како „лудо и опасно”. Според истражување за NBC News, 54 отсто од гласачите ја критикуваат политиката на Трамп кон Иран, додека 41 отсто ја поддржуваат.