Израелскиот премиер Бенјамин Нетанјаху му предложил на американскиот претседател Доналд Трамп јавно да ги повикаат Иранците на протести против нивната влада, но Трамп го одбил планот оценувајќи го како премногу ризичен.

„Зошто би повикувале луѓе на улиците кога само ќе бидат убиени?”, му рекол Трамп на Нетанјаху, според извори запознаени со разговорот.

САД и Израел се согласуваат за многу воени цели во конфликтот, но се разликуваат околу прашањето за промена на режимот во Иран. Додека Нетанјаху го гледа поттикнувањето на народен бунт како централен дел од израелските цели, американските функционери ја опишуваат промената на режимот повеќе како потенцијален „бонус” за Трамп.

По израелските удари во кои загинаа Али Ларијани, шефот за национална безбедност на Иран, и Голареза Солејмани, командант на милицијата Басиџ, Нетанјаху тврдел дека иранскиот режим е пред колапс и дека условите се зрели за дополнителна дестабилизација.

Двајцата лидери се согласиле да почекаат и да набљудуваат дали Иранците ќе излезат на улиците за време на претстојниот Фестивал на огнот. Нетанјаху јавно повика на учество, но одѕивот бил минимален, што функционерите го припишуваат на постојаниот страв од одмазда на режимот.