Министерот за здравство Аазир Алиу денеска соопшти дека за нов в.д. директор на Клиниката за неврологија е назначен д-р Јован Божиновски, специјалист невролог и асистент на Медицинскиот факултет во Скопје. Истовремено се формирани комисии кои ќе вршат надзор врз работата на клиниката.

Причината за смената на досегашниот директор д-р Игор Кузмановски е видео-материјал со компромитирачка содржина, објавен на 10 октомври, кој, според член 111 став 1 точка 4 од Законот за здравствена заштита, претставува нарушување на угледот на јавната здравствена установа.

„Министерството е во постојана комуникација со Лекарската комора. Формирана е комисија во Министерството, побаран е инспекциски надзор од Државниот санитарен и здравствен инспекторат, а потоа ќе се спроведе и интерна стручна проверка на Клиниката,“ изјави министерот Алиу.

Со овие мерки, Министерството најавува заострена контрола и одговорност во јавните здравствени установи, со цел враќање на довербата во здравствениот систем.