Глобалниот долг достигна рекордни 337,7 билиони долари на крајот на вториот квартал од 2025 година, соопшти денес Институтот за меѓународни финансии (IIF).

Задолженоста скокна за повеќе од 21 билион долари во првата половина од годинава, што се должи на:

• попуштање на финансиските услови на глобално ниво,

• слабеењето на американскиот долар,

• поблага монетарна политика на водечките централни банки.

 Најголем раст на долгот во апсолутни износи е забележан во Кина, Франција, САД, Германија, Велика Британија и Јапонија, при што дел од порастот се должи на падот на вредноста на доларот. Американската валута ослабела за 9,75% од почетокот на годината во однос на главните светски валути.

Институтот потсетува дека ваквиот темпо на раст е споредлив со втората половина од 2020 година, кога пандемијата предизвика нагло зголемување на глобалната задолженост.

Однос долг/БДП:

• Најголем пораст: Канада, Кина, Саудиска Арабија и Полска.

• Пад: Ирска, Јапонија и Норвешка.

Вкупниот глобален однос на долг и производство останува нешто над 324%, а на пазарите во развој изнесува 242,4%.

Дополнително, долгот на пазарите во развој во вториот квартал од 2025 пораснал за 3,4 билиони долари, достигнувајќи повеќе од 109 билиони долари – нов историски максимум.