По случајот со смртта на новороденчето на Клиниката за гинекологија и акушерство (ГАК), од установата соопштија дека е пристигнат патохистолошкиот наод од обдукцијата. Според резултатите, не се утврдени физички повреди на ниту еден орган кај новороденчето.

„По отворањето на градната и абдоминалната празнина, васкуларните органи се со уреден анатомски статус и морфологија“, се наведува во наодот.

Како причина за смртта е утврдена респираторна инсуфициенција, односно респираторен дистрес синдром, поврзан со незрелост на белодробното ткиво. По добивањето на резултатите, од клиниката информираат дека семејството било уредно повикано и лично запознаено со сите детали од обдукцискиот наод.

За понатамошно расчистување на случајот, Министерството за здравство формирало стручна комисија која треба целосно да го анализира текот на лекувањето и да утврди дали постоеле евентуални пропусти. Од ГАК уверуваат дека ќе постапат согласно сите законски процедури и, доколку има основ, ќе поведат дисциплинска постапка во предвидениот рок.

Од клиниката изразуваат длабоко сочувство до семејството и нагласуваат дека загубата на секој детски живот е и професионална и емотивна болка за здравствените работници. „Вработените на ГАК секојдневно се борат за животите на многу новороденчиња, но за жал, постојат и случаи со трагичен исход“, стои во соопштението.