Плоштадот посветен на Јосип Броз Тито во Велење, Словенија, утрово осамна со тешко оштетен споменик, откако непознат сторител ја отстранил главата од статуата висока повеќе од шест метри. Инцидентот веднаш предизвика големо внимание во јавноста, а локалната полиција за кратко време го реши случајот.

Според информациите, осомничен е 49-годишен жител на областа Велење. Полицијата го запрела неговото возило „Шкода Кодијак“, опремено со две различни хрватски регистарски таблички, и во багажникот ја пронашла бронзената глава од споменикот.

Расветлувањето на случајот започнало по пријава од сведок, кој видел како маж товари голем метален предмет во темен автомобил во близина на музичкото училиште. Полициската управа во Целје го класифицира настанот како „чин на сквернавење на културното и историското наследство“.

Истрагата продолжува под сомнение за кривично дело – оштетување или уништување предмети од особено културно значење.